{פ}
באא בְּ֭נִי אִם־תִּקַּ֣ח אֲמָרָ֑י
וּ֝מִצְוֺתַ֗י תִּצְפֹּ֥ן אִתָּֽךְ׃
בב לְהַקְשִׁ֣יב לַחׇכְמָ֣ה אׇזְנֶ֑ךָ
תַּטֶּ֥ה לִ֝בְּךָ֗ לַתְּבוּנָֽה׃
גג כִּ֤י אִ֣ם לַבִּינָ֣ה תִקְרָ֑א
לַ֝תְּבוּנָ֗ה תִּתֵּ֥ן קוֹלֶֽךָ׃
דד אִם־תְּבַקְשֶׁ֥נָּה כַכָּ֑סֶף
וְֽכַמַּטְמוֹנִ֥ים תַּחְפְּשֶֽׂנָּה׃
הה אָ֗ז תָּ֭בִין יִרְאַ֣ת יְהֹוָ֑ה
וְדַ֖עַת אֱלֹהִ֣ים תִּמְצָֽא׃
וו כִּֽי־יְ֭הֹוָה יִתֵּ֣ן חׇכְמָ֑ה
מִ֝פִּ֗יו דַּ֣עַת וּתְבוּנָֽה׃
זז יִצְפֹּ֣ןקקקרי/כתיב · (וצפן) יִצְפֹּ֣ן לַ֭יְשָׁרִים תּוּשִׁיָּ֑ה
מָ֝גֵ֗ן לְהֹ֣לְכֵי תֹֽם׃
חח לִ֭נְצֹר אׇרְח֣וֹת מִשְׁפָּ֑ט
וְדֶ֖רֶךְ חֲסִידָ֣ו יִשְׁמֹֽר׃
טט אָ֗ז תָּ֭בִין צֶ֣דֶק וּמִשְׁפָּ֑ט
וּ֝מֵישָׁרִ֗ים כׇּל־מַעְגַּל־טֽוֹב׃
יי כִּֽי־תָב֣וֹא חׇכְמָ֣ה בְלִבֶּ֑ךָ
וְ֝דַ֗עַת לְֽנַפְשְׁךָ֥ יִנְעָֽם׃
יאיא מְ֭זִמָּה תִּשְׁמֹ֥ר עָלֶ֗יךָ
תְּבוּנָ֥ה תִנְצְרֶֽכָּה׃
יביב לְ֭הַצִּ֣ילְךָ מִדֶּ֣רֶךְ רָ֑ע
מֵ֝אִ֗ישׁ מְדַבֵּ֥ר תַּהְפֻּכֽוֹת׃
יגיג הַ֭עֹ֣זְבִים אׇרְח֣וֹת יֹ֑שֶׁר
לָ֝לֶ֗כֶת בְּדַרְכֵי־חֹֽשֶׁךְ׃
ידיד הַ֭שְּׂמֵחִים לַעֲשׂ֥וֹת רָ֑ע
יָ֝גִ֗ילוּ בְּֽתַהְפֻּכ֥וֹת רָֽע׃
טוטו אֲשֶׁ֣ר אׇרְחֹתֵיהֶ֣ם עִקְּשִׁ֑ים
וּ֝נְלוֹזִ֗ים בְּמַעְגְּלוֹתָֽם׃
טזטז לְ֭הַצִּ֣ילְךָ מֵאִשָּׁ֣ה זָרָ֑ה
מִ֝נׇּכְרִיָּ֗ה אֲמָרֶ֥יהָ הֶחֱלִֽיקָה׃
יזיז הַ֭עֹזֶבֶת אַלּ֣וּף נְעוּרֶ֑יהָ
וְאֶת־בְּרִ֖ית אֱלֹהֶ֣יהָ שָׁכֵֽחָה׃
יחיח כִּ֤י שָׁ֣חָה אֶל־מָ֣וֶת בֵּיתָ֑הּ
וְאֶל־רְ֝פָאִ֗ים מַעְגְּלֹתֶֽיהָ׃
יטיט כׇּל־בָּ֭אֶיהָ לֹ֣א יְשׁוּב֑וּן
וְלֹֽא־יַ֝שִּׂ֗יגוּ אׇרְח֥וֹת חַיִּֽים׃
ככ לְמַ֗עַן תֵּ֭לֵךְ בְּדֶ֣רֶךְ טוֹבִ֑ים
וְאׇרְח֖וֹת צַדִּיקִ֣ים תִּשְׁמֹֽר׃
כאכא כִּֽי־יְשָׁרִ֥ים יִשְׁכְּנוּ־אָ֑רֶץ
וּ֝תְמִימִ֗ים יִוָּ֥תְרוּ בָֽהּ׃
כבכב וּ֭רְשָׁעִים מֵאֶ֣רֶץ יִכָּרֵ֑תוּ
וּ֝בוֹגְדִ֗ים יִסְּח֥וּ מִמֶּֽנָּה׃