ספר תהלים

{פ}　　
לגאא רַנְּנ֣וּ צַ֭דִּיקִים בַּֽיהֹוָ֑ה
לַ֝יְשָׁרִ֗ים נָאוָ֥ה תְהִלָּֽה׃
בב הוֹד֣וּ לַיהֹוָ֣ה בְּכִנּ֑וֹר
בְּנֵ֥בֶל עָ֝שׂ֗וֹר זַמְּרוּ־לֽוֹ׃
גג שִֽׁירוּ־ל֭וֹ שִׁ֣יר חָדָ֑שׁ
הֵיטִ֥יבוּ נַ֝גֵּ֗ן בִּתְרוּעָֽה׃
דד כִּֽי־יָשָׁ֥ר דְּבַר־יְהֹוָ֑ה
וְכׇל־מַ֝עֲשֵׂ֗הוּ בֶּאֱמוּנָֽה׃
הה אֹ֭הֵב צְדָקָ֣ה וּמִשְׁפָּ֑ט
חֶ֥סֶד יְ֝הֹוָ֗ה מָלְאָ֥ה הָאָֽרֶץ׃
וו בִּדְבַ֣ר יְ֭הֹוָה שָׁמַ֣יִם נַעֲשׂ֑וּ
וּבְר֥וּחַ פִּ֝֗יו^נפִּ֝֗יו · א=פִּ֝יו (השמטת נקודת הרביע) כׇּל־צְבָאָֽם׃
זז כֹּנֵ֣ס כַּ֭נֵּד מֵ֣י הַיָּ֑ם
נֹתֵ֖ן בְּאוֹצָר֣וֹת תְּהוֹמֽוֹת׃
חח יִֽירְא֣וּ מֵ֭יְהֹוָה כׇּל־הָאָ֑רֶץ
מִמֶּ֥נּוּ יָ֝ג֗וּרוּ כׇּל־יֹשְׁבֵ֥י תֵבֵֽל׃
טט כִּ֤י ה֣וּא אָמַ֣ר וַיֶּ֑הִי
הֽוּא־צִ֝וָּ֗ה וַֽיַּעֲמֹֽד׃
יי יְֽהֹוָ֗ה הֵפִ֥יר עֲצַת־גּוֹיִ֑ם
הֵ֝נִ֗יא מַחְשְׁב֥וֹת עַמִּֽים׃
יאיא עֲצַ֣ת יְ֭הֹוָה לְעוֹלָ֣ם תַּעֲמֹ֑ד
מַחְשְׁב֥וֹת לִ֝בּ֗וֹ לְדֹ֣ר וָדֹֽר׃
יביב אַשְׁרֵ֣י הַ֭גּוֹי אֲשֶׁר־יְהֹוָ֣ה אֱלֹהָ֑יו
הָעָ֓ם ׀ בָּחַ֖ר לְנַחֲלָ֣ה לֽוֹ׃
יגיג מִ֭שָּׁמַיִם הִבִּ֣יט יְהֹוָ֑ה
רָ֝אָ֗ה אֶֽת־כׇּל־בְּנֵ֥י הָאָדָֽם׃
ידיד מִֽמְּכוֹן־שִׁבְתּ֥וֹ הִשְׁגִּ֑יחַ
אֶ֖ל כׇּל־יֹשְׁבֵ֣י הָאָֽרֶץ׃
טוטו הַיֹּצֵ֣ר יַ֣חַד לִבָּ֑ם
הַ֝מֵּבִ֗ין אֶל־כׇּל־מַעֲשֵׂיהֶֽם׃
טזטז אֵֽין־הַ֭מֶּלֶךְ נוֹשָׁ֣ע בְּרׇב־חָ֑יִל
גִּ֝בּ֗וֹר לֹא־יִנָּצֵ֥ל בְּרׇב־כֹּֽחַ׃
יזיז שֶׁ֣קֶר הַ֭סּוּס לִתְשׁוּעָ֑ה
וּבְרֹ֥ב חֵ֝יל֗וֹ לֹ֣א יְמַלֵּֽט׃
יחיח הִנֵּ֤ה עֵ֣ין יְ֭הֹוָה אֶל־יְרֵאָ֑יו
לַֽמְיַחֲלִ֥ים לְחַסְדּֽוֹ׃
יטיט לְהַצִּ֣יל מִמָּ֣וֶת נַפְשָׁ֑ם
וּ֝לְחַיּוֹתָ֗ם בָּרָעָֽב׃
ככ נַ֭פְשֵׁנוּ חִכְּתָ֣ה לַֽיהֹוָ֑ה
עֶזְרֵ֖נוּ וּמָגִנֵּ֣נוּ הֽוּא׃
כאכא כִּי־ב֭וֹ יִשְׂמַ֣ח לִבֵּ֑נוּ
כִּ֤י בְשֵׁ֖ם קׇדְשׁ֣וֹ בָטָֽחְנוּ׃
כבכב יְהִי־חַסְדְּךָ֣ יְהֹוָ֣ה עָלֵ֑ינוּ
כַּ֝אֲשֶׁ֗ר יִחַ֥לְנוּ לָֽךְ׃