ספר משלי

כטאא אִ֣ישׁ תּ֭וֹכָחוֹת מַקְשֶׁה־עֹ֑רֶף
פֶּ֥תַע יִ֝שָּׁבֵ֗ר וְאֵ֣ין מַרְפֵּֽא׃
בב בִּרְב֣וֹת צַ֭דִּיקִים יִשְׂמַ֣ח הָעָ֑ם
וּבִמְשֹׁ֥ל רָ֝שָׁ֗ע יֵאָ֥נַֽח עָֽם׃
גג אִישׁ־אֹהֵ֣ב חׇ֭כְמָה יְשַׂמַּ֣ח אָבִ֑יו
וְרֹעֶ֥ה ז֝וֹנ֗וֹת יְאַבֶּד־הֽוֹן׃
דד מֶ֗לֶךְ בְּ֭מִשְׁפָּט יַעֲמִ֣יד אָ֑רֶץ
וְאִ֖ישׁ תְּרוּמ֣וֹת יֶהֶרְסֶֽנָּה׃
הה גֶּ֭בֶר מַחֲלִ֣יק עַל־רֵעֵ֑הוּ
רֶ֝֗שֶׁת^נרֶ֝֗שֶׁת · א=רֶ֝שֶׁת (השמטת נקודת הרביע) פּוֹרֵ֥שׂ עַל־פְּעָמָֽיו׃
וו בְּפֶ֤שַֽׁע אִ֣ישׁ רָ֣ע מוֹקֵ֑שׁ
וְ֝צַדִּ֗יק יָר֥וּן וְשָׂמֵֽחַ׃
זז יֹדֵ֣עַ צַ֭דִּיק דִּ֣ין דַּלִּ֑ים
רָ֝שָׁ֗ע לֹא־יָבִ֥ין דָּֽעַת׃
חח אַנְשֵׁ֣י לָ֭צוֹן יָפִ֣יחוּ קִרְיָ֑ה
וַ֝חֲכָמִ֗ים יָשִׁ֥יבוּ אָֽף׃
טט אִֽישׁ־חָכָ֗ם נִ֭שְׁפָּט אֶת־אִ֣ישׁ אֱוִ֑יל
וְרָגַ֥ז וְ֝שָׂחַ֗ק וְאֵ֣ין נָֽחַת׃
יי אַנְשֵׁ֣י דָ֭מִים יִשְׂנְאוּ־תָ֑ם
וִ֝ישָׁרִ֗ים יְבַקְשׁ֥וּ נַפְשֽׁוֹ׃
יאיא כׇּל־ר֭וּחוֹ יוֹצִ֣יא כְסִ֑יל
וְ֝חָכָ֗ם בְּאָח֥וֹר יְשַׁבְּחֶֽנָּה׃
יביב מֹ֭שֵׁל מַקְשִׁ֣יב עַל־דְּבַר־שָׁ֑קֶר
כׇּֽל־מְשָׁרְתָ֥יו רְשָׁעִֽים׃
יגיג רָ֤שׁ וְאִ֣ישׁ תְּכָכִ֣ים נִפְגָּ֑שׁוּ
מֵ֤אִיר עֵינֵ֖י שְׁנֵיהֶ֣ם יְהֹוָֽה׃
ידיד מֶ֤לֶךְ שׁוֹפֵ֣ט בֶּאֱמֶ֣ת דַּלִּ֑ים
כִּ֝סְא֗וֹ לָעַ֥ד יִכּֽוֹן׃
טוטו שֵׁ֣בֶט וְ֭תוֹכַחַת יִתֵּ֣ן חׇכְמָ֑ה
וְנַ֥עַר מְ֝שֻׁלָּ֗ח מֵבִ֥ישׁ אִמּֽוֹ׃
טזטז בִּרְב֣וֹת רְ֭שָׁעִים יִרְבֶּה־פָּ֑שַׁע
וְ֝צַדִּיקִ֗ים בְּֽמַפַּלְתָּ֥ם יִרְאֽוּ׃
יזיז יַסֵּ֣ר בִּ֭נְךָ וִינִיחֶ֑ךָ
וְיִתֵּ֖ן מַעֲדַנִּ֣ים לְנַפְשֶֽׁךָ׃
{פ}　　
יחיח בְּאֵ֣ין חָ֭זוֹן יִפָּ֣רַֽע עָ֑ם
וְשֹׁמֵ֖ר תּוֹרָ֣ה אַשְׁרֵֽהוּ׃
יטיט בִּ֭דְבָרִים לֹא־יִוָּ֣סֶר עָ֑בֶד
כִּי־יָ֝בִ֗ין וְאֵ֣ין מַעֲנֶֽה׃
ככ חָזִ֗יתָ אִ֭ישׁ אָ֣ץ בִּדְבָרָ֑יו
תִּקְוָ֖ה לִכְסִ֣יל מִמֶּֽנּוּ׃
כאכא מְפַנֵּ֣ק מִנֹּ֣עַר עַבְדּ֑וֹ
וְ֝אַחֲרִית֗וֹ יִהְיֶ֥ה מָנֽוֹן׃
כבכב אִֽישׁ־אַ֭ף יְגָרֶ֣ה מָד֑וֹן
וּבַ֖עַל חֵמָ֣ה רַב־פָּֽשַׁע׃
כגכג גַּאֲוַ֣ת אָ֭דָם תַּשְׁפִּילֶ֑נּוּ
וּשְׁפַל־ר֝֗וּחַ^נוּשְׁפַל־ר֝֗וּחַ · א=וּשְׁפַל־ר֝וּחַ (השמטת נקודת הרביע) יִתְמֹ֥ךְ כָּבֽוֹד׃
כדכד חוֹלֵ֣ק עִם־גַּ֭נָּב שׂוֹנֵ֣א נַפְשׁ֑וֹ
אָלָ֥ה יִ֝שְׁמַ֗ע וְלֹ֣א יַגִּֽיד׃
כהכה חֶרְדַּ֣ת אָ֭דָם יִתֵּ֣ן מוֹקֵ֑שׁ
וּבוֹטֵ֖חַ בַּיהֹוָ֣ה יְשֻׂגָּֽב׃
כוכו רַ֭בִּים מְבַקְשִׁ֣ים פְּנֵֽי־מוֹשֵׁ֑ל
וּ֝מֵיְהֹוָ֗ה מִשְׁפַּט־אִֽישׁ׃
כזכז תּוֹעֲבַ֣ת צַ֭דִּיקִים אִ֣ישׁ עָ֑וֶל
וְתוֹעֲבַ֖ת רָשָׁ֣ע יְשַׁר־דָּֽרֶךְ׃